ENGLISH DESCRIPTION

HAUSA DESCRIPTION

A cikin wata dattijuwar bola mai wari da cunkoso, wata ƙaramar yarinya mai suna Amatu ta durƙusa tana kwasar busasshen biredi daga shara saboda tsananin yunwa. Bakinta ya bushe, hanjinta na ƙuna, jikinta na rawa saboda kwanaki da dama bata ci abinci ba. Amma kafin ta gama cin rabin biredin, wani ƙaramin almajiri mai idon yunwa ya ƙwace mata shi da ƙarfi ya cinye.

A wannan duniyar babu tausayi ga marasa ƙarfi.

Ba ta da uwa.
Ba ta da uba.
Ba ta san kowa nata ba sai bola, yunwa, ƙazanta, da tsira da rai.

Rayuwarta gaba ɗaya ita ce neman rubabben abinci a kwatoci, shan ruwan da mutane suka wanke ƙafafu da shi, da kwanciya kusa da gawa ba tare da ta san mutuwa ba.

Sai kuma wani abu ya sauya rayuwarta.

Wannan almajirin da ya ƙwace mata biredi daga baya ya zama mutum guda ɗaya da ya tsaya mata a rayuwa. Usman. Yaro mai ciwon yunwa, azaba, da ƙaddarar da ta fi shekarunsa nauyi. Daga ranar suka fara yawo tare, suna rabawa juna ƙaramin abincin da suka samu, suna kare juna daga mugunyar duniya.

Amma rayuwa bata taɓa tausaya musu ba.

An ci zarafinsu.
An kore su.
An yi musu duka.
An cutar da su.
An jefa su cikin yunwa, sata, gidan yari, da duniyar da kuɗi suka fi mutunci daraja.

Lokacin da wasu miyagun mutane suka sace Usman cikin dare suka lalata rayuwarsa, Amatu ta fara fahimtar cewa talauci ba yunwa kaɗai yake kawowa ba. Yana kashe zuciya, yana rusa ƙuruciya, yana mayar da mutum dabba mai neman tsira.

Daga yaran bola marasa gata zuwa matasa masu zuciyar dutse, MIN QALB labari ne mai cike da tausayi, tashin hankali, soyayya ta jini, cin amana, rayuwar almajiranci, talaucin Najeriya, da yaƙin neman kuɗi ko ta halin ƙaƙa.

Shin Amatu da Usman za su taɓa samun soyayya da kwanciyar hankali a rayuwarsu?
Ko kuwa duniya za ta ƙara mayar da su mugaye kamar yadda ta yi musu?

MIN QALB ba kawai Hausa novel bane.
Labari ne da zai karya zuciyarka, ya sa ka kuka, ya sa ka fusata, sannan ya hana ka ajiye wayarka har sai ka gama karantawa.